Thursday 2 November 2017

嘻嘻哈哈又一日的同事

不論公司、部門、職級,身邊不乏一些面對難關問題挑戰總能擺出一副「哦,輕鬆」樣子的同事。簡單來說,他們被歸類為沒所謂的人,對人對自己都沒有什麼要求。當上司要他做這做那,均絕少黑面Say No。

「Jason,唔好意思,你今日可唔可以做埋呢個testing先走呀?」
「好呀,即做。」
半小時做完,交貨。即睇。
「呀⋯⋯唔係咁,Jason你執執佢,要咁咁咁。」
「哦,改?好呀。」
十分鐘改完。再睇。
「呀⋯⋯Jason,差少少喎。你明唔明我要求?睇吓呢幾個sample,點解有duplicate invoice number?」
「哦,係喎,我再執。」

有時已經講到炆炆地,他們仍然保持一個笑笑口的表情。你忍不住要責怪他嗎?即使質素連合格也稱不上,事實是他肯OT幫手已經要還神了。

你不忍心教訓他,只能好言相勸:「Jason,麻煩晒你今日幫手搞埋個(無鬼聊)testing,不過有好多careless mistakes,下次要小心啲做。」
他保持那笑容謂知道,補上一句不好意思,然後再次笑笑口跟你講Bye Bye。

起初我誤會他是一個得過且過的人,直至發現一個跟Jason相似的同Grade。「Hea住做才能保持實力。」同Grade這樣說。「Wok到死的確多點人工,但我現在輕輕鬆鬆鄧梓峰都不錯,無致命錯誤,年底不炒我就可以了。」每天抱著嘻嘻哈哈又一日的心態返工,開心又輕鬆。跟我筆下的auditor大相逕庭吧?是的,除了天天呻辛苦的那班人外,還有很多是活得挺自在。

我心裡羨慕,他們才是懂得玩適者生存遊戲的人,處之泰然未必因為擁有超班的能力,而是因為相信世上無難事,只怕「無心人」。有心未必成功,但無心就有機會插柳柳成蔭,而無心下的成功比付出十成功夫得來的更有滿足感。正因沒有付出半斤努力,竟然能獲得八両甚至更多的回報,賺凸有餘了。

有種人跟他們很相似但其實不同,就是那些專睇人眉頭眼額,看環境、睇老闆,在適當時候才發力的人。Jason那種不懂這些攻心計,除了做個開心快活人,他們真的對什麼都無所謂。完美表現四個字,隨遇而安。當其他人為這客戶那老闆煩惱時,他們總會說:「唔駛擔心,又唔死人嘅。」以這心態上班,單是求生這一項指標,他們倆絕對稱得上是audit生還者。


Image may contain: tree, sky, outdoor and text

No comments:

Post a Comment